【食譜】日式做法!汁煮三文魚

food-yesnews:

玩完幾日要收拾心情,要重回小小工作空間,又要重回做煮飯呀媽。

包包一連食街外食物幾日,之後就要禁室培「肉」食番媽咪早午晚餐。

包包比較唔好彩,佢有個寫食的媽媽,除了帶佢出街食得好,晌屋企都日日唔同口味,做成佢人仔細細都已經從色香味去判斷食物,有時煮得無咁吸引佢一望就已經唔多肯食,有時我一話煮牛扒同意粉,佢就雀躍一日,所以我每次煮比佢要花大量心思,希望佢「合眼緣」。

當然可能有啲三姑六婆又會話:「咁細個寵壞晒」。

對於小兒品德我比較注重,但佢對食物要求……媽咪有能力比到,我理得你講乜,係咪先?

昨日午餐整「汁煮三文魚」,當然係日式做法,我煮呢個目的唔係食佢食魚,係要令佢食埋牛蒡同埋紅蘿蔔。

結果:咪就係成功囉!

不過張相影得唔靚,因為影時佢不停晌我隔離催我。

呢個汁用醬油、味醂、少少糖、鹽去做,但出來效果不錯呢~

材料:

三文魚柳     1大件(連皮去炆會實淨啲)

紅蘿蔔及牛蒡   ¼-1/2條切幼條

大蔥     1/2條

醬汁:

醬油(或生抽)    半至1湯匙

味醂    1湯匙

水   1/2碗

糖   1茶匙

鹽    少許

做法:

1將三文魚煎香佢,可以用少少鹽醃完先煎

2將紅蘿蔔絲、牛蒡絲及大蔥絲爆香

3加入醬汁後用細火煮滾後就將魚回鑊

4煮至收汁便完成


飲食資訊由熱新聞提供
原文連結: 騙徒系列

更多相關內容