【聖誕傳統】點解聖誕要食火雞?有趣習俗你要知

聖誕對好多人嚟講,就係放假同埋飲飲食食!但既然每年都幾日假放,又點可以只知享受而唔去了解下當中嘅意義呢?當然有關聖誕老人嘅相信大家都聽到厭,唔使再多解釋,反而聖誕節食火雞嘅傳統習俗,就真係得好少部分人知喎。香港人就算平時見唔到火雞,但一到呢啲日子,喺超市就會見到有得賣,仲要大把外國人家庭排住隊買,但好肯定十個人食十個人都會話唔好食,仲會好奇,既然唔好食,點解仲要一直有呢個傳統呢? 

話說火雞其實係美洲特產,可以幻想成為「野生雞」。自歐洲幾百年前入侵美洲,再落地生根,歐洲人一向食開鵝,但美洲當時未有「鵝」呢樣生物,但相反火雞就殺之不絕,於是歐洲人開始食火雞,仲覺得比鵝仲要好味!不過要數到聖誕食火雞嘅起源,有傳1620年,英國新移民去到美洲一座荒山之上,奈何當哋各種生物都非常缺乏,唯獨不缺嘅就係漫山嘅火雞。於是佢哋喺聖誕當日就決定炮製各種口味嘅火雞菜式。結果一直就成為一種聖誕嘅傳統。

至於另一個疑問,相信係點解火雞英文叫「Turkey」,其實當年「土耳其」已經係叫Turkey,歐洲人之所以叫火雞做Turkey,原來係因為覺得火雞頭紅身黑嘅造型,好似土耳其傳統服飾,於是戲稱做火雞,結果一叫就叫足400幾年。不過喺土耳其,佢哋唔會叫做火雞,反而係叫「Hindi」,噢?Hindi豈不是解「印度」?無錯,原來土耳其人又借用返印度嘅雞,以為佢哋係印度雞,所以叫Hindi。

知道咗有關聖誕火雞嘅傳統習俗,大家以後又會唔會鍾意多咗食火雞呢?不過香港平時好少有地方有得賣,想食嘅朋友快啲趁聖誕食飽佢啦!

.

相關文章:

Jamie Oliver 教你4 招焗出完美聖誕火雞【有片】

【又到聖誕】焗火雞點先嫩滑?原來要咁樣浸

聖誕火雞伴香辣磨菇汁 聖誕火雞伴香辣磨菇汁 提供食譜