【秋季湯水】入秋進補有妙法?實試兩間新派燉湯舖

近排行街搭車聽到一街「嚏嚏嚏」的炒栗子聲就知轉季喇!今次介紹呢兩間湯水舖都係有心小店,在傳統燉湯上加入新元素,進補之餘又有新意,值得一試!

【立即讚好】全新 Yahoo Food Facebook 專頁

第1間店名「椰小盅」,打正旗號做椰盅湯水。店主之一的Zico,在一次機緣下接觸到原個椰子燉湯,一試愛上!就索性以此概念開店。(a)

暫時清一色用越南椰子,貪佢夠椰香。椰子開蓋後,會加入椰汁及湯料,然後燉足4小時,非常夠火喉。(a)

織金竹笙子椰小盅 $58。指定用貴州竹笙,size比一般的大條厚肉,配西施骨及杞子等燉製,能補氣益腎,解毒排脂。(a)

人蔘燉烏雞椰小盅 $62。每盅都有原條人蔘,配烏雞、准山、杞子等燉成,未食都聞到非常濃郁的蔘香!(a)

加分位是每盅都一定分有雞胸及雞脾,不怕配料分得不平均。(a)

蟲草花乾貝鮮鮑燉土雞椰小盅 $76。原隻鮑魚配蟲草花夠晒矜貴,入口甘甜不油膩,蟲草花對鼻敏感及氣管敏感尤其有益,天氣轉凍就最啱飲。(a)

逾70元一盅燉湯當然不算平,但絕對好足料,鮑魚燉過後仍然香甜軟腍。(a)

燉湯可另配椰小飯 $62 - $82(價錢按款式而定)。細細碗,每碗都以大米、小米、糙米、黑米及紫薯煮成,飽肚又健康。(a)

金脆鮮奶椰小凍 $48。Menu內唯一一款甜品,以鮮奶及椰子水製成,帶淡淡椰子香甜,最正係夾著絲絲椰肉,配埋以椰子肉烘香而成的脆脆,更有層次。(a)

可原盅買走take away,用真空包裝,100%不會倒瀉,夠用心。(a)

第2間小店”Soupday”,以soup bar形式包裝,主力外賣,舖面也設少量座位。中上環區湯水舖不少,但感覺新派的,絕不多見。(b)

黑蒜螺頭燉湯 $58。近年成為大熱super food的黑蒜拿來入湯,配圓肉及螺頭燉最少4小時,原汁原味,勁鮮甜!(b)

原粒黑蒜入湯,唔好俾佢外表嚇怕,其實腍腍地又幾甜。(b)

滑雞冬菇粥 $58。應熟客要求新增的熱粥,有皮蛋瘦肉、南瓜粟米及菜乾豬骨。推介圖中的冬菇滑雞,熱辣辣,綿滑帶甜。(b)

花旗參燉雞湯 $68。唔少得傳統補身湯水,火喉掌握得好,雞肉燉完仲好嫩,唔嚡身。(b)

黃耳雙菇竹笙燉湯 $58。坊間湯品舖少見的素食item,以黃耳、竹笙、紅棗、桃膠及猴頭菇燉成,是menu內最清的一款。(b)

黃耳是三菇六耳中珍品之一,厚身,需要浸幾個小時才可用來熬燉,其膠質豐富,補腦,能清肺熱、治高血壓,好補!

經典蛋白杏仁茶 $58。落足心機,連杏汁都係自己磨製,入口滿滿杏香,飲完成個人暖笠笠。(b)

INFO
a/椰小盅燉湯專門店
地址: 旺角白楊街2A號(5202 1535)
c/ Soupday
地址:中環善慶街5號 (6386 4688)

【有好東西分享?】立即去Yahoo Food Facebook 專頁投稿/片