如果你覺得川菜得個辣字你就錯啦~ 高質川式點心週末午市放題食後感

Y小編

早前小編同大家介紹咗川流嘅假日任食點心,小編都忍唔住親身去品嚐一下,真係好有驚喜!等小編為大家一一介紹啦~

餐廳並唔似傳統川菜咁用上明亮嘅中式裝修,反其道用咗日式酒吧嘅格調,據講呢度夜晚除咗火鍋同私房菜之外仲會變身酒吧,有機會一定要黎飲返幾杯。

呢度茶芥收$25/位,連茶壺都唔似其他中式茶樓,好精緻。其實睇Menu選擇唔算真係好多,不過出面仲有一個自助沙律吧,係野食到之前可以當前菜食住先,係熱食之前好好開開胃。

沙律吧嘅配菜都好吸引,好用心好有質素,其實每一盤用黎單賣應該都已經超過個任食價。而且每款前菜都配有各自嘅醬汁,足見餐廳嘅用心。

棒棒雞配棒雞麻醬汁,有少少似手撕雞,特別嘅係佢加咗火龍果同青瓜,入口好清爽,肉質嫩滑,醬汁唔會辣,相信係小朋友最愛。

蒜泥白肉配甜紅蒜泥汁,甜紅蒜泥汁睇落好紅以為會好辣,其實只係少少辛香味,白肉片配粉片真係好夾!

五香牛肉配醬麻油汁,五香味可以去除牛肉腥味,肉質軟腍。

川北涼粉配涼粉汁上面仲有食用花朵做裝飾,拌入香辣嘅涼粉汁非常開胃。

如果想再重口味少少可以試酸辣拌闊粉,清新嘅辣味同酸味令成個粉變得不油膩。

食完辣嘢或者主菜之後記得整返碗軟滑嘅古方紅糖豆腐花,唔止解辣,仲為整個午餐畫上完美句號。

之於點心方面,雖然選擇唔算多,但喜歡食點心嘅人一定會好滿足,因為每一樣點心都係落足本用心精製,首先小編就同大家分享自己覺得最好食嘅3項必點:百花煎酿蘿蔔糕、糊辣殼酸辣抄手同蝦汁小籠包。

百花煎酿蘿蔔糕最特別之處就係佢無放蝦米,取而代之嘅係於蘿蔔糕中間夾咗1/3咁多嘅蝦肉同蝦子,所以食落真係非常之有層次,係好少可以食到嘅美味,加上伴碟嘅醬汁,味道令人一試難忘。

糊辣殼酸辣抄手真係好高質,佢嘅酸辣係吞落肚之後係喉嚨慢慢咁散發,唔會好嗆喉,感覺好清新,唔係一下攻擊你嘅辣味,加上皮薄餡靚嘅抄手,絕對值得一人一碗啊~

蝦汁小籠包好得意,有條尾係上面,佢會同埋一管管嘅醋上,比你將醋直接注射入小籠包入面,好玩又好食,仲好Ig-able,足見巧思,咬落湯汁爆到成個口都係蝦嘅香味,可謂色香味俱全。

另外仲有包點、蒸餃燒賣同炸物可以選擇,小編已經全部試晒,全部都係水準之上,就放題而言真係好難得啊!

同場加映:單點美食及創意雞尾酒

除咗週末午市放題,呢度平時都推出唔少高質川式美食,例如:醋椒胡辣羹、文殊院甜水麵、家鄉燻臘肉胡椒餅,食醋椒胡辣羹嘅時候不妨落少少頂級楜椒粉同100萬度辣嘅辣椒粉,唔好以為會辣到噴火,其實係幾順口架~

當然呢度有得酒吧,又點少得美酒?除咗可以單點酒品,仲可以試一試佢地嘅創意雞尾酒,今次餐廳就推薦咗呢個舌尖上的花椒同Gariguette,前者係得獎作品,以Gin加上清酒、茶及花椒等川式味遁調製而成,杯邊仲有搌壓過嘅茶葉同砂糖作最後調味;而Gariguette一定會係女士最愛,粉嫩色調嘅調酒上插住一粒士多啤梨玫瑰,味道清甜易入口,男士點返杯比另一半一定令佢心花怒放。

小編仲八到佢地新年有XO醬蘿蔔糕賣,不過今次實在係食唔落啦,有興趣不妨買返抵返屋企煎香同新朋好友分享啊~

川流


地址: 灣仔太和街28號灣仔薈賢居地舖
電話: 31266633