【廚房秘技】水果同菜唔可以一齊放?烹飪達人教你延長蔬菜壽命!

香港人生活忙碌,真係唔會日日都有時間去買餸。雖然話一次過買多啲會平啲,但餸菜始終保質期有限,尤其係蔬果類!想做到慳錢慳力慳時間?咁就要跟喺Youtube有近29萬粉絲、開設教煮頻道「張媽媽 MamaCheung」的李慧芝(張媽媽)學嘢喇!

買菜要慳錢,首要可以留意當造嘅菜,例如喺秋天可以揀蓮藕、冬天就可以選擇豆苗。其次買嘅份量可以多啲,例如一次過買兩斤。不過買完兩斤返屋企都要識處理、延長到菜嘅保質期,先真正慳錢又慳時間!

用報紙包菜相信好多人都知,不過張媽媽就唔太建議,因為會令菜有陣油墨味,相反,可以用Tea Towel,因為大塊之餘、無味亦疏水,令到菜無咁快腐爛。包之前記得唔好先清洗同切菜,包嘅時候亦唔好包得太實!包好後放入雪櫃就可以,不過要避免放喺水果隔籬,因為有啲水果會令菜更快變熟,變相令保質期變短。另外,屋企如果有唔要嘅包裝紙,都可以用嚟包水果,都一樣可以延長保質期。

呢個時期買當造豆苗就最啱喇!但買得多返屋企,餐餐都齋烚又會好悶,所以張媽媽就畀三個食譜大家參考,分別係紅燒豆腐扒豆苗、鮮魷扒豆苗同瑤柱扒豆苗,多啲花款就唔怕悶啦!

各式豆苗食譜:

(一)瑤柱扒豆苗
材料:
一磅豆苗
四粒已發好的瑤柱 拆絲
一隻蛋白
一湯匙蒜蓉
一茶匙薑蓉

老抽

料酒
蠔油
生粉
金華火腿粒
胡椒粉

做法:
炒香金華火腿粒、薑粒和蒜蓉,再放入豆苗,用大火炒,可加入少許糖去除草青味。當豆苗軟身後,在鑊邊灒一湯匙酒後搇蓋十秒,然後取出。把鑊燒紅後加油,放入乾瑤柱、蠔油、乾瑤柱水,蓋上蓋將乾瑤柱煮至軟身後加3/4茶匙糖。用大火煮滾後收細火,蓋上鍋蓋煮三分鐘。加胡椒粉並用生粉水埋芡,調細火後加入發好的蛋白並加少許麻油。先後把芡汁和火腿粒放上豆苗上便完成。

(二)豆腐扒豆苗
材料:
一磅豆苗
120克盒裝或布包豆腐
300毫升上湯
少許糖
生粉
一隻蛋白
半茶匙麻油

做法:
炒香薑粒和蒜蓉,再放入豆苗,用大火炒,可加入少許糖去除草青味。當豆苗軟身後,在鑊邊灒一湯匙酒後搇蓋十秒,然後取出。將豆腐切成丁狀粒,加上湯煮滾後加少許糖,再加生粉埋芡 ,其後加入蛋白做出蛋花效果,最後加上半茶匙麻油。把豆腐放於菜上即完成。

(三)鮮魷扒豆苗
材料:
一磅豆苗
250克鮮魷
胡椒粉
少許鹽
一粒蒜蓉
一片薑
一粒紅葱頭
一隻紅椒或西紅椒(視乎個人口味)
120毫升雞湯
生粉
半茶匙麻油

做法:
炒香薑粒和蒜蓉,再放入豆苗,用大火炒,可加入少許糖去除草青味。當豆苗軟身後,在鑊邊灒一湯匙酒後搇蓋十秒,然後取出。把鮮魷洗淨喺𠝹花並切件,以胡椒粉和少許鹽作醃料。預備配料包括蒜蓉、薑粒、紅葱頭、紅椒或西紅椒(視乎個人口味),配料全部切碎,紅椒則切小件,將所有配料爆香後落鮮魷,鮮魷炒至捲起後加入雞湯並以生粉水埋芡,最後加半茶匙麻油並放於菜上即可。

製作:倫星揚

想要慳錢慳力慳時間,不妨參考張媽媽延長蔬果保質期的方法。
用報紙包菜外,張媽媽更建議用tea towel,比報紙更疏水透氣。
張媽媽提醒大家包菜時不要過度用力,因為蔬菜亦需要空間呼吸。
除了tea towel,包裝紙亦可循環再用,用來包菜或水果。