【大角咀美食】低調素食buffet自助餐!$68任食40款新派素菜

人生中,總有一班酒肉朋友。一通電話、一個WhatsApp,赴湯蹈火都出來。隊啤。吃肉。講是非,不醉無歸。豪情是豪情、義氣是義氣,但有一點要注意,就是如此暴飲暴食,實在不健康,真係朋友的,不如走肉,齊齊做個健康好老友。

【立即讚好】全新 Yahoo Food Facebook 專頁

這裏是大角咀博文街的盡頭,每日下晝午餐時分,或是夜晚晚飯時間,這裏都有一群人在聚集。他們不幫襯茶餐廳,也不去火鍋店打邊爐,他們在等待,吃素食自助餐。「抵喎我覺得,自助午餐$68任食一個鐘,呢區算平啦!」一個在附近返工的OL說。望望門口餐牌,價錢也真是便宜。午市自助餐由11:30am-3pm任食一個鐘平日$68;星期六日、公眾假期做到4pm,每位$90,任食75分鐘。晚市分兩個時段,第一場6:00pm-7:30pm; 第二場8:00pm-9:30pm,星期一至四大人$125、小童$95。星期五六日、公眾假期及初一十五,大人$150、小童$120。以自助餐價錢來說,也不能說不便宜了。

素食自助餐,沙律款式多又新鮮,菜蔬一咬爆汁。
裝修走摩登型格路線,樓底又高,食得舒服。

素食不會悶

至於抵唔抵,就要看環境和食物了。走進店,樓底很高,灰水泥牆,白瓷磚牆,感覺型格摩登。除了普通方枱,又有高高的吧枱,自成一國,方便一大班人來傾偈。自助餐區佔了一半舖位,一盤盤一碟碟,放得井然有序。又細心,含蛋奶或蔥蒜的款式,都有標籖清楚顯示,方便不同需要人士。沒有芋頭魚、齋鮑魚等老派素食,主打新派素菜,大約四十款菜式,包括沙律吧、熱盤主菜、湯及甜品等,陣容幾鼎盛。 

沙律夠新鮮,各式沙律菜青瓜番茄粟米等,選擇很多。熱菜款式不老套,海南雞、天婦羅、中東卷……有。連地道港仔最愛的煎釀三寶、混醬腸粉都有,真的很有親切感。「怕悶嘛!我哋會定期推出唔同主題,開業至今經已推出過港式、台式、日式、南洋風情、京川滬篇、夠薑找素等等主題喇!」收銀處一個中年男士說。

煎釀三寶,素肉做饀,有齊矮瓜、紅椒、青椒,熱辣辣唔油膩好好食。
連豬腸粉都有,自己混醬,又係食到清碟。

散發正能量

他叫Johathan,是餐廳老闆之一,人超低調,一聽見上鏡便耍手擰頭。他開素食餐廳,不是因為宗教,及是為了健康。「Green Monday、間中素食、佛教徒、甚至非素食者都好,不論你是什麼原因今天走肉,大家都是地球的朋友。」Johathan說。

他愛運動,專長三項鐵人,行出來已散發一股正能量。他和朋友眼見香港社會氣氛日益沉重,普羅大眾飲食又不健康,於是兩年前合資開素食餐廳,希望讓人感受正能量,注意身體健康,使世界更美好。也不是嘴皮吹吹就算,是身體力行的,像開張時,便謝絕開幕花籃,改為呼籲直接捐助慈善團體RCAP,拯救更多被遺棄動物的生命。2018年又聯同Furry Kitchen推出寵物走肉零食,淨利潤全數捐贈予慈善團體RCAP 拯救遺棄寵物中心。又向區內長者派飯盒飯券,真箇大愛無疆界。

炸物最緊要新鮮,這裏每次少量炸,差不多賣完再炸,脆卜卜熱辣辣。
甜品最人氣係佢,紫薯當雪糕。

 「唔阻你食嘢喇!食完記得將碗碟杯筷放落回收箱,同清理番自己食剩嘅食物,自己親手掉,咪知道下次唔好攞咁多囉,要珍惜食物呀!」Johathan說。

哇!今次真係食嘢又學嘢喇!

走肉‧朋友

地址: 大角嘴博文街28-30號地下

電話:23886280

撰文、攝影:譚偉健

【有好東西分享?】立即去Yahoo Food Facebook 專頁投稿/片