【元朗美食】太安樓小店范湯皇搬入元朗!淨做晚市訂枱私房菜

在這荒誕乖謬的年代,良心幾錢斤?做生意的,總想辦法巧取豪奪賺到盡。做人的,機關算爆咪蝕底。哪有人,打開門做生意,會真心真意為客人著想?一天只做一轉客,食材唔靚唔會用。標準私房菜單,兩個頭盤一個湯四個主菜加甜品,但價錢卻只收三百大元,試問是哪門子的做生意。「是但啦!邊度計得咁多吖!」這句話,在元朗新店范湯皇老闆范太口中是平常,但在許多人心目中,卻是:「有冇搞錯呀!咁點樣做生意呀?」

【立即讚好】全新 Yahoo Food Facebook 專頁 

從元朗西鐵朗屏站F出口走出來,扶手電梯下馬路對面,有個新的私人屋苑叫虹方。簇新的店舖中,不少仍在裝修,有一家,裝修好了,卻又靜英英的,午市來,櫈還倒擱在枱上,不像在做生意。「係呀!我淨係做晚市架咋,只做訂枱私房菜單,午市?咁辛苦,唔做咯!」一個媽媽款的太太邊在廚房洗着一條魚邊說。「呢條燕子䱽嚟架!我專登搵番嚟架,有個熟客話鍾意嘛,我咪去搵囉。」她說。

揀舖似揀老公

她是范太,范湯皇的主理人。港島東區的饕客,對她不會陌生,因為五年前,她曾在筲箕灣太安樓商場內,開設小店范湯皇,以家庭小菜及愛心湯水招徠,解救了不少無飯夫婦兩餐溫飽,滋潤了幾許宅男宅女乾涸心靈。「係呀!要搬我都好唔捨得架,鬼叫加租加得咁厲害咩?」范太說。

她也真的不捨,和熟客拍了一大堆照片,還裱在相框中掛滿新店一堵牆。細細看,咦!食家劉致新、美食達人盧覓雪都在榜上,豈只街坊小店,原來是名人飯堂耶!「係呀!好多人畀面囉!當年結業個個都話唔捨得,大家都幫我搵舖位,我揀嚟揀去,最後揀咗呢度。唔知點解呢,總之一見個舖位就鍾意,有啲似見到老公咁!」她說完自己也哈哈大笑。

范太愛心靚湯,今天是夏枯草豬橫脷,清熱滋補呀!
番茄牛肉飯,是范太氹細路仔食飯之作,番茄汁融入飯粒,彩椒五顏六色,牛肉又香又滑,吃到碗底朝天。
馬友蒸馬友,新鮮馬友放一塊馬友鹹魚清蒸,放薑葱瀩豉油熟油,鹹魚香吊出魚鮮,正。

食材用最好的

講真,這年頭,開餐廳,要打響名堂是很難的事。還要得大量名人死心塌地支持,更是難上加難。更難的是,竟然在事事順利的時候結業,重出江湖又不選址在同區港島東,選在大西北的元朗,真的甚麼熟客都跑掉精光啦!「咁又唔係喎!好多熟客知道我開番,都專登過嚟幫襯。新客又多咗好多,算唔錯。」范太一邊淥雲吞一邊說。

能夠讓客人忠貞不移,靠的第一件事,當然是食物。「我好奄尖架,食材唔靚我唔要架。」她每天一朝早,就開車去街市買餸,大埔墟街市買海鮮、元朗街市買肉……總之哪裏食材靚就去嗎裏。燕子䱽大連鮑魚、湖北蛋……盡是好東西。「湖北蛋都有分級數㗎,我用A級,最靚嗰種,炒得起身兼色水靚吖嘛。」她說。每天一煲湯,總是費盡心機,像採訪當天,就正煲着夏枯草豬橫脷,她不是去看看火路,生怕煲不好。「夏枯草唔可以煲超過九個字,煲太耐冇功效㗎。馬蹄呢要連皮落,咁對身體有益啲。」她說。別看她入得廚房,廚技精湛,就以為她跟過甚麼名師,得過甚麼指導。實在她只不過是個不折不扣的太太,而且有一段長時間,十指不沾陽春水。

蝦仁炒蛋,用大大隻鮮蝦及 A級湖北蛋炒,嫩滑鮮爽香噴噴。

 

酸齋都是自己用麵筋做,不用醋,下山楂餅做汁,吃來喉頭舒服不嗆。
咦!見到雪雪喎!

闊太變身良廚

「其實我以前冇做過生意㗎!日日瞓醒覺去修甲恤髮下午茶。」她笑笑的說。她丈夫是生意人,仔女已大,家有工人,過着養尊處優的生活。閒時無事,就約人飲茶Shopping,只是空閒時間太多,空虛感也日益增多,有時閒到發荒,她會問自己,真的想過這樣的生活嗎?做人真的就這樣嗎?

人生的契機,總在問問題開始。由於丈夫做生意,家裏經常宴客,無聊的她,想學煮餸,好招呼客人。「冇拜師㗎!係自己睇下書、睇下電視咁囉,最緊要敢試,試得多就得啦!」她一經開始,便不能停止。她在爐火中,彷彿找到第二春,愈煮愈起勁,便去老人院做義工,煮給老人家吃。得到讚賞,愈戰愈勇,2015年終於全情投入,在筲箕灣開了范湯皇,之後的故事,已寫在前兩段了。

「好!搞掂。」范太拿着一大盤剛做好的雲吞,滿意的說。 

「咦!你今晚先做私房菜,咁早淥好啲雲吞咪唔好食囉?」我疑感的問。「唏!呢啲雲吞係樓上間台灣菜館開張PARTY用架!佢唔得閒整,我幫佢整之嘛!」她還打算把雲吞親自送上人家舖裏。「咁橫掂得閒,幫補下燈油火蠟都好嘅。」我說。「咩呀!我冇收人錢架。唏,邊計得咁多吖?」吓!喂!范太,邊有人咁做生意架!

 

地方簡約清潔,原來花了過百萬裝修。
廚藝無師自通,入廚功架,都是實戰得來。
每日接訂單,擬好菜單才開工。
熟客要吃靚魚,她千方百計都找回來。

范湯皇

地址:元朗宏業南街22號虹方地下5號舖

電話: 6623 3698 

撰文、攝影:譚偉健

【有好東西分享?】立即去Yahoo Food Facebook 專頁投稿/片